HURDAY PARIVASH…

Hurday parivash qiz ekan,
Oy yuzlari kunduz ekan,
Qoshi kamon, qunduz ekan,
Farmonlari so‘zsiz ekan,
Qay bog‘din ul? Gulyuz ekan…
Ko‘ksi tog‘u, ko‘ngli bahor,
Orzusi billur, misli qor,
O‘ng yuzda xol, bo‘ynida nor,
La’li labida shahdi bor,
Fikri yasanmish kuz ekan,
Kiprik sadog‘i o‘q otur,
Vujud saroyga cho‘g‘ otur,
Chobuk, karashma yo‘q, otur,
Ishq kahkashondin tug‘ botur,
Oymomamu, yulduz ekan?..
Ko‘rdum chamanda bir pari,
Aslo ketolmasdin nari,
Etdi asir ko‘nglum barin,
Nayzasi bolday bolari,
Qalbi sharormu, muz ekan?
Topolmayun imkonini,
Ololmay ahd, paymonini,
Kezdim jahon ayvonini,
Jonona bergum jonimi,
Lab ochmadi dilso‘z ekan.
Ey lafzi shakar, fe’li bad.
Sho‘xluklaringga bormu had?..
Oqil azal, jonim ahad,
Ruhim ravondur, sarv qad,
Koring nahot buz-buz ekan?..
Ko‘rdum umr choshgohina,
Naq yozining ardog‘ina,
Bosh urdi dil ishq bog‘ina,
Jonim muhabbat chohina,
Tangrim Malik, Navro‘z ekan!..
__________________________________________Abdumalik ISOMIDDIN