Didingizdan san’at yarating!

Nimalarda ko‘rinar asli,
Muxlis bilan tinglovchi farqi?
Kim chin muxlis, kimlar tinglovchi,
Qay birining yuqori narxi?..

..Darhaqiqat, zavq berar qo‘shiq,
Sho‘x musiqa bo‘lsa kifoya.
Men Rayhonga muxlismasmanu,
“So‘naman”ni tingladim, boya.

Shahzodani tinglab “To‘kilib,”
Kanizada zavq “His et”aman.
“Ko‘z ko‘z(im)ga boqsa” Amira,
Meksikaga uchib ketaman.

“Daydi” bo‘lgum Munis kuylasa,
“Nilu” berar “Tantana” dilga,
Manzurani “Juda sog‘indim”.
“Lav mi” Lola men bilan birga.
“Sevadi yorim mani” desa,
Jo‘shqin xislar dilda Ziyoda.
“Pari”dagi uchta qiz bilan,
Rimga kegum, hatto piyoda.

“Begim” degan Dilso‘zla birga
Ruhim osmon toqida yelar.
“Shakarchoyim” bo‘lsa Tamilla,
Bitta ho‘plab yutvorgim kelar.
Eski qizim uchratib qolsam,
Uchinchimiz “Ummon” bo‘ladi.
“Sokin tun”da yana xotira –
Sevgi ustimizdan kuladi.

Aslbekning “Manisha”sila,
Mango yesak, “Dard ber”ing deydi.
Jasur Umir “Hanifa”sila,
Sabbuferning “bass”i zo‘r yeydi…
Shohruxxonning xirgoyilari
“Mening qo‘shig‘im”ga aylangan.
“Bojalar”u “Benom” kuylari
Orqa miyam aro joylangan.

Ha, tinglayman, ular barchasin,
Nafsga orom xissini ekib,
Go‘yo o‘ylab qanday tashlashni
Sigaretni sigaret chekib…