3-may – Ommaviy axborot vositalari erkinligi kuni: “Adolat nishoni ostida” Sardor Komilov! (ochiq suhbat)

O‘ziga xos yozma uslub egasi, bir qaraganda g‘alatiroq shuur sohibi, orginal va biroz telbanamo fe’l-atvorini o‘zi ham tan olsa-da, ko‘pchilikning fikricha dimog‘dor va takabbur bo‘lgan Sayyod huzurida IDROK.UZ mehmonda bo‘ldi va keyin savollari bilan mezbonlik vazifasini o‘z zimmasiga olib, oshkora javoblarni qo‘lga kirita olgani orqali Sayyodni o‘lja ham aylantira oldi.

Foto: ©Sayyodmedia________________________________________________________________

“Bizda faqat “O‘zbeknavo” efirga cheklov qo‘ymaydi-ku!”

IDROK.UZ: – O‘zingiz ijod qilib yozgan “adolat nishoni” ostida bugun o‘zingiz ekan Sayyod, dastlabki savol: “Sayyodmedia” bilan bog‘liq bugungi qo‘shiqchilik san’atida ketuv qanday? San’atda aynan qanaqa xayrli ishlar bilan bandsiz hozir? Qo‘shiqchilikdagi “o‘g‘rilik”lar kamayib qoldimi yoki holat o‘zgarishsizmi?! 
Sardor KOMILOV: – Kanizaning “Xolasi ammasi”ga so‘zini yozib bergandim. Unda ham ozarbayjon xalq musiqasi “o‘g‘rilangan”. Lekin men boshidan Kanizaga plagiat qilmaslikni maslahat bergan edim. “Shuni musiqasi yoqyapti, hamma shunday qilyapti-ku, qilaman” dedi va musiqa ko‘chirildi, mayli. O‘zi aslida o‘zbek shou-biznesi rivojlanayotgan pallada Yulduz Usmonovadan tortib Setora guruhigacha hamma ko‘chirgan. “Qo‘lsiz qoldim, berib barmog‘im”, “Tanhoman-tanho” musiqalari ham Daler Nazarovdan olingan. Menda hammasining asl manbaalari bor.
Lekin o‘sha “Xolasi ammasi”ning musiqasi ko‘chirilayotganida bundan keyin Kanizaga toza mualliflik qo‘shig‘i yaratish istagini bildirsagina birga ishlashimni aytdim. “Sayyodmedia”da plagiatga joy yo‘q, dedim. U rozi bo‘ldi va uning “Xolasi ammasi-2” ashulasini to‘laligicha o‘zim tayyorlab berdim. Yaxshi bir g‘oya bo‘yicha klipini ham suratga oldik.
IDROK.UZ: – Studiyadagi bu ishlar saytdagi faoliyatingizga ta’sir qilmayaptimi?
Sardor KOMILOV: – Ulgirishim qiyin bo‘lyapti, vaqt kam. Saytni birortaga topshiray desam, ko‘nglimdagidek yaxshi ijodkorlar yo‘q. “Jurnalist shou” ham qildim natija bo‘lmadi.
IDROK.UZ: – Bir necha marta saytni yopaman, dedingiz vertualda…
Sardor KOMILOV: – Ha, chunki meni bulardan tashqari boshqa ishlarim ham bor-de… Mahallamdagi ko‘p qavatli uylarga kommunal ta’mir xizmati bo‘limining(JEK. tahr.)ning direktoriman. Ko‘chamizning obodonlashtirish ishlariga ham bevosita mas’ulman. Yaqinda mahallamizga yangi asfalt yotqizish, bolalar maydonchasi qurilishi ishlarini tashkillashtirib, amalga oshirdik. Bir-ikkita tadbirkorlar kelib, ko‘p qavatli uyimizning hovlisidagi joylarning ma’lum qismida aholiga xizmat ko‘rsatish faoliyat turi bilan shug‘illanuvchi bir narsa ochayotib, ko‘chamizga yangi asfalt yotqizishi, yana biri bolalar maydonchasi qurib berishi taklifini bildirdi.  Mahallamiz obod bo‘lib qoldi, aholi ham hursand.
IDROK.UZ: – Bunday ochilmagan qirralaringiz ham bor ekan-da, yaxshi… Endi bevosita savollarga o‘tsak. “O‘zbeknavo” bilan suhbatingizdan shaxsan qoniqmadim, ta’qiqlar masalasida.
Sardor KOMILOV: – Nega qoniqmaganingizni tushunib turibman. Men so‘radim, lekin mas’ul xodim hozirda “O‘zbeknavo” litsenziya beruvchi tashkilot sifatida hech bir san’atkorga nisbatan hech qanday ta’qiq qo‘ymagan, dedi. Ta’qiqqa uchragan san’atkorlarni bu tashkilot o‘z sayti orqali bevosita e’lon qilib boradi. Bitta narsani tushuning, bizda faqat “O‘zbeknavo” efirga cheklov qo‘ymaydi-ku! “O‘zbeknavo” o‘zi uchun javob beryapti, u haq. Shu o‘rinda suhbatni bitta kichkina joyini intervyuda yozmadim, Sizga aytaman. “Unday bo‘lsa, Yulduz Usmonovaning yangi klipini “Navo”da ko‘rarkanmiz-da”, dedim. U hatto Yulduz Usmonovaning ham faoliyat uchun litsenziyasi borligini tasdiqladi.
San’atkorlarning ta’qiqqa uchrashi bo‘yicha shaxsiy fikrim: tarbiyaning muhimligi. O‘z o‘rnida shunaqa qattiqqo‘llik ham kerak ekan san’atga.
IDROK.UZ: – Tasavvur qiling, Siz “O‘zbeknavo”ning rahbari etib tayinlandingiz, hozirgi yangi rahbar suhbatingizda aytgan va qilmoqchi bo‘lganlaridan farqli qanday tub burilishlar yasay olgan bo‘lardingiz?
Sardor KOMILOV: – Birinchidan, fonogrammali konsertlarni butunlay yo‘qotgan bo‘lardim. Faqatgina maydondagi ssenariy asosida tuzilgan dasturlar bundan mustasno, chunki bunda san’atkor va sozandalarning almashinuvi vaqt talab qiladi. Ssenariy bo‘yicha qo‘yilishi kerak bo‘lgan ovozlarda fonogramma qilmaslikning iloji yo‘q. Xalqning pulini olib, qo‘yilayotgan konsertlarning fonogrammada o‘tishini esa hazm qilolmayman. San’atkorlarning esa bahonasi ko‘p: apparaturalar javob bermaydi, va hokazo-va hokazo. Ovozim yo‘q, demaydi hech biri.
Mana, Piligrim jonli konsertni minus ustidan berdi. Faqat musiqasi elektron bo‘lgani sababli fonogramma bo‘lib, ovozi esa jonli bo‘ldi. Hisob! Terlab-pishib bo‘lsa ham ayta oldi. Konsertining chiptasi pulini halolladi. Shunchaki ovozi yo‘qlargina jonliga bahona qiladi. To‘ylardagi fonogrammaga esa menga qolsa, jinoiy javobgarlik qo‘ygan bo‘lardim.
Yaqinda suhbatimizda Mahmud Namozov ham bugungi to‘ylardagi holatdan hafa bo‘ldi. “To‘yga borsak, anavi ashulangizni qo‘yvoring, deyishyapti. Qanday qilib qo‘yvoraman, axir…” deydi u.
IDROK.UZ: –  San’atdagi bugungi kiyinish madaniyatiga qanday baho berasiz, ayniqsa qizlarimiz va ayol xonandalarga?!
Sardor KOMILOV: – San’at shunaqa narsaki, san’atkor bu artist. “Ilhom” teatrida ko‘rganmisiz, kerak bo‘lsa, shir yalong‘och chiqib rol o‘ynashadi. Dilnoza Kubayeva ham qaysidir rolida sigaret chekib chiqqandi. Bu obraz, bu rol! Yulduz Usmonovaga shu mavzudan savol berganimda u kishi ham men artistman, degan. Artist bu otinoyi emas, o‘qituvchi emas. U qanaqadir obrazda bo‘ladi doim.

Foto: ©Sayyodmedia________________________________________________________________

IDROK.UZ: – Kanizaning “His et haroratim”i ham mo‘tadil holatmi unda?
Sardor KOMILOV: – Yo‘q, unday demadim. Tomoshabin va tinglovchida qanaqadir shahvat uyg‘otish kabi salbiy targ‘irbotlar chegarani buzish degani. Buni men ham qoralayman. Lekin hozir Kaniza xatolarini to‘g‘rilab, milliy kiyimlarda milliy ijroga o‘tgan. Bitta narsa borki, inson xatolarini tushunib, yaxshi tomonga o‘zgarsa, kecha kim edingu, bugun kimsan tushunchasidek deyish kerakmas. Ana shu holat aksincha bo‘lishi yomon, ya’ni kecha ijobiy bo‘lib keyin salbiylikka cho‘ksang bu noto‘g‘ri!

“Shou-biznesning axboroti axborotmi?”

IDROK.UZ: – Saytingiz elektron OAV sifatida ro‘yxatdan o‘tganmi?
Sardor KOMILOV: – Shou-biznes saytlariga ro‘yhatdan o‘tishning nima keragi bor? Shou-biznesning axboroti axborotmi? Yarmidan ko‘pini piar bosib yotibdi-ku! Agar siyosat, sport, madaniyatga oid mavzularni yoritsam, o‘tgan bo‘lardim. Mening saytim bu shaxsiy ijodiy sahifam. Lekin men fikrimni sotmayman. Ya’ni, nimanidir qo‘llab-quvvatlab reklama qilishim mumkinu ammo fikrimni sotmayman!
IDROK.UZ: – Demak boshqa elektron OAVlar fikrini sotib pul topayapti, Siz esa unday emas, shunaqami?
Sardor KOMILOV: – Yo‘q, men o‘zim uchun javob beryapman. Masalan deylik, ro‘yhatdan o‘tib chinakam internet nashr sifatida faoliyatimni davom ettirsam, olgan litsenziyamni harajatini oqlash uchun qanaqadir “Hoji ota kolbasalari” yoki qandaydir noskilarni reklamasini qo‘yishim kerak bo‘ladi. Ana shu narsani men fikrimni sotish hisoblayman.
IDROK.UZ: – Virtualdan “Otabek Irgashev” degan do‘stimiz savol beryaptilar: “Sayyod”ning jurnalistik yo‘nalishida biryoqlamalik kuzatiladi ba’zida. Butun saytning ketuvi faqat Sardor Komilovning shaxsiy qarashlari, simpatiyalari asosida shakllanayotgandek nazarimda. Tezkorligi, ochiqligi yaxshi albatta, lekin matbuot xalq uchun ishlashi kerak-ku, deyilmoqda savolda.
Sardor KOMILOV: – Qanaqa bir yoqlamalik? Odamlar o‘qiyapti, xalq uchun ishlayapmiz-ku!
IDROK.UZ: – Ma’lum bir auditoriyani butun xalq deb bo‘ladimi. Shaxsiy sayt xohlasang o‘qi, xohlamasang yo‘q, men shunaqaman, deganimi? Qoidaga rioya qilinmaydimi? Imlo xatolar, ruscha so‘zlar qo‘shib yozish?! Siz uchun bular shunchaki ikkinchi darajalimi?
Sardor KOMILOV: – Siz hozir hamma narsani chalkashtirib tashladingiz. Agar men hozir siz aytgandek yozsam, Sayyod bo‘lmasdim. Odamlarga xalq tili kerak. Agar men o‘sha siz aytgandek rasman elektron OAV sifatida ro‘yhatdan o‘tganimda talab qilishingiz mumkin edi. Hozir esa men saytda – o‘z shaxsiy kundaligimda talaffuzimizda, kundalik hayotda ishlatiladigan so‘zlardan foydalanishga haqliman. Deylik, toza tabiiy sut ishlab chiqaruvchi fermam bor. Ba’zi boshqa odamlar nega toza sut chiqaryapsan, qaynatilgan emas, bizga qaynatilgani kerak, deyaversin, men o‘zgarmayman. Chunki tabiiy sutga ehtiyojmand xaridorlarim bor. Bunday ijod mening hobbiyim.
IDROK.UZ: – Yozma ijodga yangilik kiritmoqchimisiz?
Sardor KOMILOV: – Yo‘q, unday emas. 2003 yil internetda – uzforumda o‘tirardim. O‘sha paytda o‘sha yerdagilardan intervyu olib, yo‘nalishim shaklandi. Shu paytgacha, shu yergacha ana o‘sha o‘zligim bilan keldim.
IDROK.UZ: – Endi sizning mushtariylaringiz soni u paytdagidan ancha yuqori, jiddiyroq bo‘lish payti kelmadimikin?
Sardor KOMILOV: – Mas’uliyati demoqchisiz. Mayli o‘zgardim ham deylik, o‘sha odamlar keyin “Sayyod”ni o‘qiydimi?
IDROK.UZ: – Auditoriyani yo‘qotib qo‘yishdan qo‘rqasiz, demak. 
Sardor KOMILOV: – Unday emas. Men shunchaki o‘zligimni o‘zgartirishni istamayman.

Sayyod 13 yoshida maktabni bitirayotgandi?!.

IDROK.UZ: – Sizdagi bu kabi holatlarni ijobiy baholab, ortingizdan ergashayotganlar-chi?! Sizga taqlidan yozayotganlar ham kuzatilyapti-ku! Misol uchun, G‘iyos ismli forum moderatoringizni shaxsiy sahifasini kuzatib, huddi sizni uslubingizni davomlayotganini ko‘rdim.
Sardor KOMILOV: – Bu narsa noto‘g‘ri. Taqlid qilma, fanatizm – dibilizm, deb ko‘p aytganman. Bu kimning aybi? O‘zining kallasi yo‘q, ayb unda, menda emas-ku! Agar men targ‘ib qilayotgan bo‘lsam, unda boshqa edi. Siz shu narsani farqlab olingki, kimdir menga taqlid qilyaptimi yoki men targ‘ibotmi? Men targ‘ibot qilmayman. Men uchun muhimi o‘zimga qarshi chiqmaslik. Agar hamma xohlagandek tomonga o‘zgarsam, o‘zligimni yo‘qotib qo‘yaman-ku! Unda men artist bo‘lib qolaman va bir kuni artistligimni qilib qo‘yaman. Ichki firibgarlik – bu.
IDROK.UZ: – Rus tilidagi so‘zlardan foydalanib bayonlashingiz sababi ham o‘zlikmi unda?
Sardor KOMILOV: – Bilasizmi, men sobiq sovet davrining odamiman. Bugungi kunda sizlar qanday o‘qiyotgan bo‘lsangiz, bizning paytda “O‘qing a’lo, bo‘ling dono, degan bizga Lenin bobo” bo‘lgan.
IDROK.UZ: – Boshlang‘ich sinfligingizda shunday bo‘lgan bo‘lishingiz mumkin.
Sardor KOMILOV: – Yo‘q, kechirasiz, men 78 yilman. Mustaqillikka erishganimizda maktabni bitirayotgan edim.
IDROK.UZ: – Aynan o‘shanda 13 yosh bo‘lgansiz, qanaqasiga maktabni bitirasiz?

Foto: ©Sayyodmedia________________________________________________________________

Sardor KOMILOV: – Yo‘q… Mayli… Lekin o‘sha yili birdaniga til o‘zgarmagan-de!.. Masalan bizga lotin yozuvi o‘rgatilganini eslolmayman.
IDROK.UZ: – Men sizga nega saytingiz lotin yozuvida emas, demadim.
Sardor KOMILOV: – Yo‘q, to‘xtang. Mana biz necha yil iskanjada bo‘ldik, taxminan 35 yilmi? O‘sha davr odamlari Sevara Nazarxon, Kumush Razzoqova, Yalla guruhi so‘zlashuv uslubida ruscha so‘zlar chiqib ketaveradi. Bilasizmi nega, chunki biz o‘sha davr ruhida aqlimizni taniganmiz. Biz hozir fikrlashimizni, tilimizni, o‘zgartirishimiz uchun yana 35 yil vaqt kerak bo‘ladi. Unaqada meni imkoniyatlarim to‘xtab qoladi, umrimni o‘qish bilan o‘tkazishimga to‘g‘ri keladi. A ya etogo ne xochu! Shuning uchunam balki saytimning muxlislari ko‘proq yoshi kattalardir?! Bu narsaga umr ketkazib, vaqtning uvoliga qolishni istamayman.
Men kerak bo‘lsa sof o‘zbekcha ham yozib bera olaman. Masalan “Sevganimga atalgan noma” ni olaylik u yerda adabiy . Sof adabiy tilda yozishim uchun bir soat o‘ylab o‘tirishim kerak bo‘ladi (kuladi). Til borasida strogiy qarash kerak emas, nazarimda.
IDROK.UZ: – Ko‘pincha jurnalist emasman deysiz, unda bloggermisiz, shoumenmisiz, shunchaki ijodkormisiz, kimsiz? Bloggerlikdan ancha yuqori turuvchi bugungi ijodiy faoliyatingizda tashqaridan o‘zingizni kim sifatida baholaysiz?
Sardor KOMILOV: – Shunchaki ijodkor! Lekin xobbiy deb bilsam-da, shu paytgacha jurnalistikaga shunchaki, yuzaki qaramadim. Ozmi-ko‘pmi foydam tegdi. Aks holda “O‘zbeknavo” ham meni taqdirlab diplom, tashakkurnoma bermagan bo‘lardi. Saytni ijodiy sahifa sifatida ochganman. “Sayyod.com” bu mening shaxsiy kundaligim.

“Qum bormi” nima degani?

IDROK.UZ: – Nima shaxsiy kundalikda haqoratli so‘zlarni ishlatishingiz ham mumkin bo‘lgan holatmi? 
Sardor KOMILOV: – Biroz qizishgan holatlarim bo‘lishi mumkin. Lekin qachon, kimni haqorat qilibman?
IDROK.UZ: – Boshqa chiqishlaringizda ham foydalanilgan va aynan mening “San’atda tarbiya berayotgan ham, buzayotgan ham Sayyod” nomli maqolamga yozgan javobingizda ham bir jumlani ishlatgansiz. Qum solingan idish oldida tushgan rasmingizni qo‘yib, “qum bormi” deya yozib qo‘ygansiz. Boshqalar buni tushunmaydi, deb o‘ylaysizmi?
Sardor KOMILOV: – Yo‘q, yo‘q, yo‘q. Bu hech ham haqorat emas. Siz bunday tushunmang-da…
IDROK.UZ: – Masalan men ham sizga javob yozib, katta xumni oldida suratga tushib, “xum bor, kerakmi” desam, qanaqa tushunasiz?!
Sardor KOMILOV: – Qilsam emas, siz qiling. Eng yomon ko‘rgan narsam shu: qilsam, aytsam…
IDROK.UZ: – Yo‘q, mening eng yomon ko‘rganim esa orqadan ana shunday haqoratomuz kesatiqlar qilish. Ochiq, yuzma-yuz suhbat bo‘lganiga o‘zingizga aytdim. Birinchisi emas, boshqa o‘rinlarda ham bu jumladan ko‘p foydalangansiz. Bu safar mening chekimga tushdi.
Sardor KOMILOV: – Yo‘q, nega Siz buni haqorat deb qabul qilyapsiz?! “Qum bormi” jumlasi jamoamizda hammamiz ishlatadigan gap-ku, shunchaki!..
IDROK.UZ: – Yo‘q, buni Siz o‘zingiz tushunasiz va jamoangizga ham to‘g‘ri tushunishlari kerakligini singdirgansiz. Aslida esa boshqacha.
Sardor KOMILOV: – Agar men sizga bu jumlani dastlab qanday madaniyatli shaxsdan eshitib, o‘zlashtirganimni aytsam, ishonmaysiz.
IDROK.UZ: – Ajablanmayman, ayting.
Sardor KOMILOV: – Yo‘q, ajablanasiz, aytmayman, ne xochu. Qumni nimasi yomon? Qum bu qurilishda foydalaniladigan mahsulot bo‘lib, suvash ishlarida ishlatiladi(kuladi).
IDROK.UZ: – “Meni tanqid qilib “qum” bormidi men mana bunday “qum” qo‘yadigan odamman”, demoqchi bo‘ldingiz. Xo‘p, agar unday bo‘lmasa, aytingchi shu qurilish mahsulotiga tanqidni aynan nima aloqasi bor?
Sardor KOMILOV: – Yo‘q, nega Sizga tegib ketdi, gospodi?! Men hammaga ishlataman, buni. (Rasmga tushirayotgan Shahlo Qodirovaga ishora qilib) Masalan, ko‘ylagingni ichidan sariq futbolka kiyib qum bormi, Shahlo, deyman. Normalniy tushunadi.
IDROK.UZ: – Siz xodimlaringizga shu narsani normalniy tushunishga o‘rgatgansiz-da!
Sardor KOMILOV: – Alisher, men Sizga bor haqiqatni yana bir marta aytyapman: biz bu so‘zni so‘kish sifatida ishlatmaymiz. Jamoamizning bundan tashqari ham o‘z prikollari bor: “g‘o‘do‘” bor, “yapasqi” bor. Bularni ham so‘kish deb tushunishingiz mumkin, lekin so‘kishmas. Sof o‘zbekona, bolalikda eshitgan, mahallinskiy gaplar.
IDROK.UZ: – Shaxsiyatingiz bilan bevosita yana bir savol…
Sardor KOMILOV: – Bemalol, men savollardan qo‘rqmayman.

Masjid imomi ham “Sayyod” saytiga kiradi

IDROK.UZ: – Ijtimoiy tarmoqlardan birida “A” ismli bir muxlisingiz menga yozdiki, uzoq viloyatdan Sizning tadbirlaringizdan biriga atayin kelgan. Bemalolroq paytingizda olingizga kelib so‘rashmoqchi bo‘lganida yuz ko‘rinishingiz o‘zgarib, uning uzatgan qo‘li havoda qolib ketgan. O‘sha paytdagi holatidan xo‘rligi kelib, keyin hatto yig‘laganini ham aytdi. Nima, shunchalik takabburmisiz?…
Sardor KOMILOV: – Astahfurilloh! (Kayfiyati tushib ketgani yuz-ko‘zidan bilindi). Alisher, bilasizmi, dunyodagi eng yomon narsa tuhmat-de!.. Menga aniq aytsinchi, salom berib qo‘l uzatibdiyu, men o‘tib ketibmanmi yonidan? Keling, mana shu odamni shu yerga chaqiring. O‘sha paytda yonimda kimlar bor edi, aytsin, yuzma-yuz ko‘rishsin-de, isbotlab, keyin gapirsin. Noto‘g‘ri narsa-de, bu! Mana, yordamchilarimdan so‘rang ishonmasangiz, muxlislar bilan qanday munosabatda bo‘lishimni. Piterdan Bobo kelib turadi, har hafta Koreyadan bir muxlisim qo‘ng‘iroq qiladi. Hammasi bilan zo‘r munosabatdaman. Shu paytgacha birorta odamning dilini og‘ritmaganman.
Yaqinda o‘g‘limning qulog‘iga azon ayttirish uchun masjiddan bir imomni olib chiqib ketayotganimda “Sayyodsiz-a”, deb so‘radi mendan. Judayam yoqimli tuyg‘uni his etdim shunda. “Saytingizga kirib turaman” deb u “Juma ovozi”ga o‘zining munosabatini bildirdi. Kimsan imomdek odamning ham e’tiborida ekanman, bu dil shodligini ifodalab berolmayman. Aytmoqchimanki, meni yoshlikdagi oiladagi tarbiyam islomiy bo‘lgan. 13-14 yoshimdan domla-ustoz ko‘rib, Qur’onga tushganman. O‘sha narsa hozir ham negizimda. Ko‘ngil, munosabat, odam bu narsalar men uchun muhim. Qanday qilib meni oldimga kelib salom bergan odamga qaramasligim mumkin?! Bu katta gunoh-ku!

Foto: ©Sayyodmedia________________________________________________________________

IDROK.UZ: – Balki xayolingiz joyida bo‘lmagandir o‘sha payt?!
Sardor KOMILOV: – Ko‘rmasdan qoldilar, behos eshitmadilar desa, tushunish mumkin. Lekin bunaqa konteksda aytish yomon. Agar ataydan o‘ylab topib aytgan bo‘lsa, tuhmat o‘ziga yaxshilik bilan qaytmaydi. “Faxrli inson” tadbirlarini, kuni kecha o‘tgan “Varrak shou”ni meni yonimda kuzatganingizda ko‘rardingiz, nechta odam suratga tushish taklifini beradi, hech birini rad etmayman. Bo‘yi pastroq bo‘lsa, egilib ham turib beraman yoki yana boshqa narsalarda… Buni ko‘rishingiz kerak-de, o‘zingiz. Hozir hammasini aytsam, maqtanish bo‘lib qoladi. Shundan kelib chiqib aytaman, o‘sha odamni mensimaganim umuman mumkinmas bo‘lgan narsa.

(P/S: Intervyudan so‘ng,  «Sayyod» yuzasidan «IDROK»ga arz qilgan o‘sha «A» ismli yigitning ijtimoiy tarmoqdagi profili o‘rganilganida u yerda aynan o‘sha tadbirda Sardor Komilov bilan tushilgan surati borligidan ajablandik. «Sayyod»ning izoh berishicha bu aynan o‘sha yigit va o‘sha tadbirdagi holat. So‘rasha olmagan odam qanday qilib suratga tushdi ekan?! Xissiyotga berilmang, muxlislar! Birovning obro‘sini to‘kish oson, tuhmat esa juda yomon).

“Rayhondan tortib, “Qurbon bo‘lman”gacha ustimdan yozgan”

IDROK.UZ: – Mayli, Sardor aka bu narsa o‘sha muxlisga yetkaziladi. Mavzuda ancha jiddiylashib ketildi. Keling lirik chekinish qilamiz. Munisa Rizayevaning “syurprizi” sizga avvaldan ma’lum edi desam, inkor etmassiz?! 
Sardor KOMILOV: – Yo‘q, ma’lum emasdi.
IDROK.UZ: – Saytingizda yozdingiz ma’lum emas edi deb, bu to‘g‘ri, lekin aslida-chi?!
Sardor KOMILOV: – Keling siz bilan bir narsaga kelishib olaylik, Alisher. Saytimda nimaki yozilayotgan bo‘lsa, barchasi rost, umuman yolg‘on yo‘q. Men xazillashishim mumkin, lekin aslo yolg‘on yozmayman. Axir bu sayt-ku!
IDROK.UZ: – Nima, saytingizda umuman yolg‘on yozilmaganmi?
Sardor KOMILOV: –Nima, bo‘lishi mumkin emasmi?.. Mana, hozir sizga Munisaning “vatsap”dan kelgan xabarini ko‘rsataman.
IDROK.UZ: – Shart emas, Sardor aka. Aytmoqchimanki, Jasur G‘oyipov avvallari sayt muxlislariga notanish bo‘lganu, keyingi paytlar xalqqa tanitish uchun, birdaniga “kim o‘zi bu” degan savol tug‘ilmasligi uchun “sayyod”da promolari berilib borildi-da, keyin sekingina Munisa Rizayeva juftiga aylandi… Tasodifmi bu?
Sardor KOMILOV: – Yoshlarga imkon berish kerak, nega qo‘ymaysan deyishadi qo‘ymasam. Eshitgan bo‘lsangiz, tan oling Jasurning qo‘shiqlari yomon emas.
IDROK.UZ: – Kichkina G‘oyipovning ashulalarini muhokama qilmoqchimasman, shunchaki holatga izoh so‘radim.
Sardor KOMILOV: – Keling, men Sizga tayyor isbotini ko‘rsata qolay, nima qilamiz behudaga bahslashib. (Telefonini qo‘liga olib, “vatsap” programmasidagi Munisa Rizayeva bilan yozishlamarini ko‘rsatadi. Uning yozishganlari haqiqiqatdan ham saytida yozilgani bilan bir xil edi).
IDROK.UZ: – Mayli, Sardor aka bunga ishondim. Endi aytingchi, biz bilamiz san’atdagi xalqqa noma’lum bo‘lgan ko‘p jihatlar sizga ma’lum. “Ta’sir qilgan tanqid yoxud endi tayor tur shou-biznes” nomli chiqishingizda yashirin sirlarni ochib tashlayman, degandingiz. Hali kuzatilmayapti-ku, san’atning asl basharalarini qachon birma-bir ochmoqchisiz? Yo jahl ustida yozdingizmi?
Sardor KOMILOV: – Alisher, bitta narsa-de, unaqa anons bergandan keyin “tap” etib bir kunda yettita narsani qo‘yib bo‘lmaydi. Lekin undan keyin qo‘yilgan maqolalarni bir qarab chiqsangiz, o‘shanaqasifatlari ham bor.
IDROK.UZ: – Bor, lekin yopiq yozilgan, aynan kimni nazarda tutayotganingiz noma’lum.
Sardor KOMILOV: – Bunda yana bir narsa bor, Alisher. Men yetti yil sud tizimida ishlaganman, qonunni yaxshi bilman. Shunaqa narsalar borki, o‘sha tanqid qilgan insoningiz sizni ustingizdan yozsa, yo fuqarolik yo ma’muriy va yoki jinoiy tomonlama sudlanishingiz mumkin. Men miyamda o‘sha kodeks bandlarini o‘ylab turgan holda yozaman ko‘p narsalarni. Lekin qo‘rqmayman. 2013 yilgacha boshim sud, prokuraturadan chiqmagan. Deyarli barcha tuman IIBlarida uy va qo‘l telefon raqamlarim bor. Hozir oilalikman, uyga kelganimda onamdan “korvalol” hidning kelishi, xotinimning olazarak ko‘zlari menga kerakmas. E-he, meni ustimdan kimlar yozmadi. Rayhondan tortib, “Asr” guruhidagi anavi bola, haligi… “Qurbon bo‘lman”. Ha, Abdulaziz Karimovgacha… Soxta prodyusserlar yozishgan bundan tashqari. “Yakshanba. Muxlis minbari”dagilar ham yozgan hatto.. Dastlab xotini yozdi, keyin eri javob yozdi, saytda chiqdi. Buyog‘i janjal jinoiy ishga aylanib ketdi. Olib tashla, deydi saytdan. Nega olib tashlayman, saytga chiqdingmi, olinmaydi. Men senlarni uyingga borib intervyu olibmanmi?..

“Hayotimda bitta holatda bosh ekkanman…”

Lekin bu degani Sayyod endi qo‘rqoqqa aylandi, degani emas. Fanforumda bir narsa yozdim “tvitter”da bo‘lgan bir voqea bilan bog‘liq. Sizga keyin link tashlayman, tanishib chiqasiz. (Fanforumdan manbaa) O‘shanda yozganman “Men hayotimda bitta holatda bosh ekkandirman, nimagaki, onam va oilamning tinchligi uchun”. O‘sha yerda batafsil yozganman. Mana hozir siz tushundingiz, “tvitter” deganimdan… Inson har qancha qo‘rqmas bo‘lmasin, onasining oldida chetga surib turish kerak bunaqa mardlikni… O‘sha kunlarda boshim tashvishdan chiqmay qoldi. Shu holat yuzasidan ozodlikchilar ham qo‘ng‘iroq qilib asabimga tegdi, zo‘rg‘a o‘zimni bosdim. Cho‘kayotgan odamni nima qilaman yanada cho‘ktirib i tem bole ayol kishi bo‘lsa… Onamning havotirlari… “Tvitter”da ham yozgandim: Farzand uchun eng yomoni uyga kelganingda tayyorlab qo‘yilgan ovqatning emas “korvalol”ning hidi dimog‘ingga urilish ekan. Ona bu shunday ulug‘ zotki, u uchun hamma narsaga tayyor bo‘lish kerak. Onam uchun, oilam, xotinim uchun… Lekin xotinimga men boshidan aytganman: chidasang shu. Men san’atkorlar bilan ishlayman. Inogda uyga Manzura kirib kelishi mumkin. Yarim kechasi Kaniza yoki Shahzoda qo‘ng‘iroq qilib qolish ham mumkin. Hatto telefonimni titkilashga ham ruhsat bermaganman. Qayoqda yuribsiz, degan savol ham ketmaydi. O‘sha talablarga yarasha men ham va’da berganman: xiyonat qilmayman, qo‘l ko‘tarmayman. Qorning to‘q bo‘ladi, men nima yesam yeysan, yetarli mehr ko‘rsataman.
Bolaligimda buvimni qo‘llarida tarbiyalanganman. Menga oila muqaddas, deya o‘rgatilgan. U yerda janjal qilib bo‘lmaydi, ichib kirib bo‘lmaydi, so‘kinish mumkin emas. Oila men uchun shunaqa narsa. Uyda biroz boshqacharoqman. Uyni gapi ko‘chaga tois saytga to‘g‘ri kelmaydi. Saytniki uyga. Onam bir marta saytimni o‘qib uydan haydab yuboray deganlar.
IDROK.UZ: – “Parvina”mi, “Parvona”mi degan gazetada ishlagan ekansiz?..
Sardor KOMILOV: – “Parvona” gazetasida ishlaganman. Mana shu narsani yozishingizni istagan bo‘lardim. Bu gazetada faoliyat yuritganim shou-biznesga shunchaki kelib qolmaganimning va shou-biznesga aralashuvgina Sayyodni ko‘tardi, degan gaplar xato ekanligining yorqin isboti. Dastlabki chiqishim va muxlis orttirishim shu gazetada “Fohisha yoki…» «Toshkent – Moskva» qissamning bosilishidan boshlangan. 2003-2004 yil yozganman, adashmasam 2007-2008 yilllarda chop etilgandi. Bundan tashqari yana ikkita qissam ham bosildi o‘shanda. Hamkorligimiz boshlanishida dastlab ular internet orqali menga chiqib, shularni bosish uchun ruhsat so‘rashgan. Men ularga bemalol faqat buzmasdan, o‘zgartirmasdan bosasizlar deganman. “U yerda so‘kinilgan joylari bor ekan” deyishgan, bitta so‘kkan joyini qoldirishgan, qaysiligini aytmayman… (kuladi). Keyin muxlislarning ovozi orqali ularning tanlovida birinchi o‘rinni olganman. Yutug‘iga kompyuter sovg‘a qilishgan.

Foto: ©Sayyodmedia________________________________________________________________

IDROK.UZ: – O‘sha gazetadan minnatdormisiz?
Sardor KOMILOV: –Albatta. Undan keyin gazetaning reytinggini ko‘tarish uchun yana bir-ikkita loyihalar qildik. Faqat, ancha vaqt o‘tgach, yaqinda o‘sha gazetaning boshlig‘i bilan “meyl”da, “tvitter”da biroz tortishib qoldik. Bir joyda meni tanqid qilib yozibdi, tili yomon, unaqa, bunaqa deb. Shunda qattiq xafa bo‘ldim. “Siz meni birinchi qadamlarimni guvohisiz-ku, o‘zingiz qo‘llab-quvvatlab priz bergansiz”, dedim…
Lekin nima bo‘lganida ham “Darakchi”dan emas, san’atkorlardan ham emas aynan “Parvona”dan meni xalqqa tanishtirgani uchun minnatdorman! Haligi aytishadi-ku: “Shahzoda bo‘lmaganida seni sayting bir tiyin bo‘lardi. Unaqa, bunaqa”… Vaholanki san’at axliga yordamim tekkan bo‘lsa borki , ularni menga reklama va piarda emas!

“Shohrux repper Shohruxxondan ham past”

Yaqinda Shohrux repperning bir gapi menga rosa alam qildi, Sizga aytishim mumkin. Bir tanqidiy materialimda Shohrux repperning yangi e’lon qilngan klipi haqida fikr bildirib, ba’zi jihatlarini ham keltirgan holda o‘zbekonalikni saqlash kerak deb yozgandim, “Nega men haqimda unaqa yozasiz?” deb “sms” yozib yuboribdi. “Bor gapni yozdim” desam, “Men yangi klipimni premerasini Sizni saytingizga berganimda tanqid qilishingiz uchun emas, saytingiz reytinggini ko‘tarib berish uchun taqdim qilgandim” dedi. Bu gapi menga shunaqa tegib ketdi: “Ey, menga qara” dedim, “Seni klipingni premerasini ko‘rishga mingta odam kiradimi-yo‘qmi. Boshqa san’atkornikiga o‘n mingta kiryapti. Seni auditoriyang katta emas, na samom dele”. Bilasizmi, birovni atrofida yuzta odam yig‘ilib, sen zo‘rsan deyaversa, zo‘r bo‘lib qolarkan. Vaholangki, mana Siz bugungi kunda Shohrux repperni reytingda nechanchi o‘rinda deb bilasiz?.. Shohruxxondan ham past, tan oling past. Chuni reklamasi ham yo‘q. Oldingi ashulalari yo‘q, promosi ham, boshqasi ham yo‘q. Odam katta ketishi kerak emas, o‘zini bilishi, yerni iskab yurishi kerak. Aytmoqchimanki, hech qaysi san’atkor meni saytimning reytinggini ko‘tarmagan! Aksincha, men ularnikini ko‘targandirman. Uslubimdan xabardorsiz, odamlarga aynan o‘sha qiziq. Ya’ni mavjud yangilikni podachasi muhim. Podacha bu mehnat, bu ijod. Nima bo’lagnida ham bu  MENATim orqali!..
IDROK.UZ: – “Sayyodmedia” faoliyatida ishchilarning, qolaversa o‘zingizning oyligingiz nimaning asosida shakllantirilyapti?
Sardor KOMILOV: – Endi-endi yo‘lga qo‘yyapmiz…
IDROK.UZ: – Xo‘p, muxlislaringiz uchun qiziq bo‘lgan yana bir savol: Kattagina mablag‘ evaziga bunyodga kelgani ko‘rinib turgan “Sayyodmedia” kimning homiyligida tashkil etildi? Yulduz Usmonova homiylik qilgan, degan gaplar ham bor…
Sardor KOMILOV: – Yo‘g‘e!.. Opaning bunga umuman aloqasi yo‘q. Ehtimol ochilish marosimidagi Ibragimovnaning ishtirokidan shu gap chiqqandir. Masalan Siz shunaqa markaz ochsangiz, kimni niyat qilgan bo‘lardingiz, lenta kesib berishga?.. U kishi bunga eng munosib nomzod.

“Yarim yalong‘och qizlar bilan loyiha qilmayman”

IDROK.UZ: – Ha, tushunarli, Sardor aka. Unda homiy kim?
Sardor KOMILOV: – Hojiakbar ismli tadbirkor bor, saytimizning muxlisi. U bilan qon aksiyasida tanishishni boshladim. Dekabr oyida jonlantirish bo‘limida yotgan bir bolani davolash uchun katta pul kerak bo‘ldi. Shu pul yig‘ilmasa, saytni yopaman, dedim. Agar shu saytim bilan bir bolakayni hayotini saqlab qolishga yordam bera olmasam, nimaga kerak bu sayt deganman. Ikki kunda o‘sha pul yig‘ilgan. Hayriya qilganlarning orasida ortig‘i bilan yordam qilgan bu inson ham bor edi. Rahmat aytib qo‘yish uchun qo‘ng‘iroq qildim. Shundan keyin aksiyalarda ko‘rishib turdik. Keyin u taklif bildirdi. “Sms” yozdi: “Sayyodmediagroup” qanaqa qaraysiz shunga, deb. Ijobiy, dedim. Bunda qanaqadir o‘zimni yo‘qotmaganimning sababi: bundan avval ham uch-to‘rtta taklif bo‘lgan. Hatto yuqori tashkilotdan bir kishi chiqib, litsenziya olib, gazetalar ham qilmoqchi bo‘lgan. Lekin men to‘xtatganman. Shoshma, nega u bunday qilyapti? Boshqa manfaat bordir bunda? Balki o‘ynashiga ochib berayotgandir, men keyin uning ishchisi bo‘lib qolarman, deb o‘ylaganman. Hojiakbar esa rostgo‘yo bola, samiiy bola. Aksiyalarimizda ham muntazam qatnashib kelayotgani uchun rozi bo‘ldim. Keyin ish tezda amalga oshib ketdi. Ko‘z ochib yumguncha mediamarkazimiz ochildi. Biz bu yerda ijarada emasmiz. Ijod qilish erkinligi har tomonlama bemalol, ko‘rib turibsiz. Tem bole masjitning oldida joylashgan fayzli mahalla. Ko‘pchilik aytishadi: san’at makruh degan so‘zlarni eshitaman. Yo‘q, o‘ylashimcha hamma narsada halollik bo‘lsa, bo‘lishi mumkinmas narsaniyam halol qilsa bo‘ladi, hatto. Masalan spirtni davolash uchun ham, aroq uchun ham ishlatish mumkin-ku! Niyatga bog‘liq faqat. Bizning san’atdagi maqsadimiz ham xolis. Odamlarning dardini oladigan, kayfiyat beradigan qo‘shiqlar yaratish. Boshidan aytganman, men uch yoki to‘rtta qiz yarim yalong‘och chiqadigan loyihalar qilmayman, deb. Kelishdik. “Asl xonanda” shousida Doniyor ismli bolani katta tanlov asosida tanlab oldik, ovozi haqiqatdan ham dardli. Ikkinchisi o‘zlarini jiyanlari Narmin ismli qiz.
IDROK.UZ: – Nega bu loyihalaringizning promosiga shoshilmayapsiz?
Sardor KOMILOV: – Mablag‘ga borib taqalyapti. U odam ham tadbirkor bo‘lgani bilan, millioner emas. O‘zining hisob-kitobi bor, boshqa ishlari bor pul bilan bog‘liq.
IDROK.UZ: – Bu ikki insonni faqatgina iste’dodi uchun ko‘tarishga harakat qilyapsizmi yoki ularning moddiy manfaatdormisiz?
Sardor KOMILOV: – Albatta faqat iste’dodi uchun. Doniyor Rahmon “Asl xonanda”da bir qancha talabgorlar orasidan tanlab olingan. Istasangiz, ovozini eshitib ko‘ring. Tanlovda “Ra’no” ashulasini kuylab, chiroyli tarzda avjiga chiqqanida chalib turgan Dilorom Omonullayeva ham ta’sirlanib ketgan. Eshitsangiz, badaningiz jimirlab ketadi. Menga mana shunaqa talantlar kerak. Kelajakda, balki keyingi yili mablag‘ bo‘lsa, iste’dodli yigitlar va balki qizlarni ham yig‘ib yana boshqa loyihalarni rejlashtirganmiz. Lekin bunda nimayki qilmaylik, zamirida halollik yotadi. Faqat jonli ijro bo‘ladi.
IDROK.UZ: – Yulduz Usmonovaning albom taqdimotini chiroyli tashkillashtirdingiz, undan keyin boshqa san’atkorlardan ham shu kabi takliflar bo‘ldimi?!
Sardor KOMILOV: – Bo‘ldi. Lekin mana qarang-de, Rayhon, Shahzoda yoki Lola. Bularning promosi yetarli va keyin ular bilan shou qilish qiziq ham emas. Yulduz bilan esa qiziq. U kishini gap so‘zlari qiziq, o‘zlari bilan odam zerkmaydi. Sherali Jo‘rayev bilan ham shou qilmoqchi bo‘ldim. Sherali aka bilan suhbat qurganman. Judayam ajoyib insonlar. Lekin o‘zimni tasavvur qilolmadim shouda(kuladi).
IDROK.UZ: – Katta konsert saroyida katta tadbir uyushtirib, “Sayyod shou” qilishingiz ham mumkinmi?..
Sardor KOMILOV: – Mumkin, lekin qilsam shunchaki qilmayman buni. Maqtanish emasu odamlar “Sayyod shou” qilsam, juda bir boshqacha narsani kutadi. Qanaqadir fishkasi bo‘lish kerak, nimadir yangilik qilish kerak. Va bunda ham faqat jonli ijro… Bunaqalar nechta? Faqat Shohjahon Jo‘rayev, Shahnoz, O‘lmas Ollaberganov, Jahongir Otajonov – to‘rtta odam bilan o‘tqizolmayman shouni.

Foto: ©Sayyodmedia________________________________________________________________

Xonanda va bastakor Shahnoz bilan boshqa loyihalar ustida ishlayapmiz. Viloyatlarda gala konsertlar uyushtirib, tushadigan pullarga “Faxrli inson”ni o‘tkazayotganimiz – Gemotologiya institutini otaliqqa olmoqchimiz. Lekin shou qilishim kerak, to‘g‘ri. Faqat avval bunda jonli aytadiganlari yig‘ib, ularga moslab ssenariy tuzib, teatrlashtirilgan konsertmi, qandaydir g‘oya o‘ylab topishim kerak. Yoki qanaqadir nominatsiya qilishim kerakdir. O‘sha Siz aytgan “o‘zbek tilini buzayotgan” stilidami, balki(kuladi).

(P/S: Suhbat yana til mavzusiga bog‘lanib ketdi) .

“Navoiy davrida yashashimiz kerakmas”

Sardor KOMILOV: – Ko‘chada e’tibor bersangiz, sof o‘zbek tilida gapirayotganlarni uchratish qiyin. Men bir narsa yozgandim, nega xorazmlik yoki surxondaryolik o‘zini shevasida qo‘shiq aytishi mumkinu toshkentlikka mumkin emas, deb. Nega toshkentliklar “votti” deb aytsa xatoyu boshqa viloyatlik o‘zini lahjasida qo‘shiq kuylasa, to‘g‘ri?!

IDROK.UZ: – Yo‘q, Sardor aka, bir narsa bor bu yerda. O‘sha siz aytgan “votti” aslida “votti” emas aslida. Yoshi katta toshkentliklarimiz bilan gaplashing “votti”mas “vutti” , “kelamiza” emas, “kelovuza” shaklida suhbat kelib chiqadi. Aytmoqchimanki, poytaxt shaharlar shevasi, lahjasi tez o‘zgaradi. Boshqa viloyatlar san’atida shevaning qo‘llanilishida esa o‘sha o‘zgarmaslik, qadiymiylik yotadi. 

Sardor KOMILOV: – Yo‘q, siz to‘xtang, agar biz tarix bilan yashashimiz kerak bo‘lganida tosh bilan gugurt chaqib o‘tirishimiz kerak edi. Har bitta narsa ma’lum bir paytda qulaylik bildiryaptimi, u o‘zining davrida foydalanilishga haqli. Nega o‘sha davrda yaratilganlarni saqlayapmizu, hozirgilardan kechyapmiz?! Balki bugungi lahja keyingilarga o‘tar. Qayerdan bilasiz, balki yuz yildan keyin “votti” butunlay adabiy til bo‘lib qolar? Agar biz o‘tmishni qo‘ldan qo‘lga berib ketaversak, bugungi davr tarixi kelajakda qayoqda qoladi? Biz o‘sha Navoiy davrida yashashimiz kerakmi, bugungi kunning Navoiylarini yetishtirishimiz joizmasmi?

Bizda jurnalistika rivojlanmagan, xafa bo‘lmang. Hammasi yoshlar. “Yevronyus”ni ko‘ring, hammasi katta yoshdagi kishilar, potamu oni znayet kak rivojlanishni. Bugungi kunda qo‘ldan qo‘lga berilayotgan narsalar judayam oz. Chunki siqib qo‘yyapti massaviy informatsiya. Shablonga tiqib qo‘yyapti. Yaratishga imkon bermayapti. Bugungi kunning tarixi nesoxranayetsya. Agar “votti”ni ham urfdan chiqarsak, 2014 yilda qaysi tilda gaplashilgan desa, ho‘ o‘sha anaqa tilda, deymizmi? Har bitta narsa tarixda qolishi kerak. O‘tmishda orqaga qaraganda hech narsa ko‘rinmaydi yoki, har bir narsa tarix-ku!.. Unga qarshi kurashish ham kerak emas. Yesli salbiy targ‘iboti bo‘lmasa… Toshkentni imenno poytaxt bo‘lgani uchun lahjasini tan olishmaydi. Buni mahalliychilik deb o‘ylayman. Mumkin emas bu. Salbiy targ‘iboti yo‘q, niyat tarixda qolish, nimasi yomon?! Fikr eto yest, bu uchun uning kallasini kesib tashlolmaysiz-ku, to‘g‘rimi?!

“Bir kunda 18 million so‘m yig‘dim”

IDROK.UZ: – Kitob o‘qib turasizmi?
Sardor KOMILOV: – Mutolaani juda yaxshi ko‘raman. Murakamidan tortib, Poalo Koyelogacha. “Ming bir kecha”dan tortib hatto “Odam anatomiyasini” ham o‘qib chiqqanman. Men o‘qimagan kitob qolmagan. Bir chekkadan aytib beray desam, hozir unchalik esimda yo‘q. Besh yoshimda “10-sinf adabiyot xristomatiyasi”ni o‘qirdim.
IDROK.UZ: – Demak, taxminan to‘rt yoshingizda harf tanigansiz?
Sardor KOMILOV: – Yo‘q, shu besh yoshimda tog‘am harf tanitgan. Keyin o‘sha kitobdan birinchi yodlagan she’rim Boburning “Charxning men ko‘rmagan” g‘azali bo‘lgan. Bugungi kunlarda “Daydi qizning daftari”dan tortib, “Shaytanat”gacha ham o‘qiganman-de! Lekin ayni paytda o‘zimni tiyaman, bilasizmi nega, kirib ketib qolaman, boshqa ishlarim qolib ketadi. Endi o‘zim kitob yozadigan davrga ham kelib qoldim.
IDROK.UZ: – Sizningcha dunyoni nima qutqaradi?
Sardor KOMILOV: – Nima dunyo cho‘kyaptimi?..
IDROK.UZ: – Xo‘p, optimist insonligingiz ko‘rinib turibdi. Vertualdan “Sherlock Xolms” nomli muxlis ham sizga savol yo‘llagan: “Har bir inson hayotda o‘z qarashiga ega ba’zilar hayotni murakkab, ba’zilar esa oson tushunadi. Sayyodning hayotga qarishi qanday?” Hayot, umuman yashash qiyinmi yoki osonmi? Jiddiyroq qaraysizmi hayotga?

Sardor KOMILOV: – Albatta. Qiyinchilik ko‘rgan inson rohatning qadriga yetadi, deb o‘ylayman. Hozirdan men ham hali chaqaloq bo‘lsa-da, farzandimni o‘rni kelganida qattiqqo‘llik bilan tarbiyalayapman. Tartib bor joyda intizom bo‘ladi. Qattiqqo‘llik kerak hamma joyda. Bu balandparvoz gapmasu, shukr qilish kerak. Televizorni yoqsangiz, hamma yoqda to‘palon. Bizdachi, odamlarga nima yetmaydi?! Taksiga chiqsam, haydovchilar noligani noligan: yo‘llar mana bunaqa, mashina ko‘p… Ha, nimaga ko‘p mashina?! Olyapsanki, ko‘payyapti. Odamlar dabdabaga o‘ch bo‘lib ketgan. Nima emush, chaqaloqni olib chiqayotganda bir nechta mashina, yana qanaqadir “Mikki maus”lar… Men unaqa qilmadim, Kaniza olib chiqdi o‘g‘limni raddomdan. Ozoda Saidzodaning singlisi Nilufar mashinasida yurib berdi. O‘zbekistonni na samom dele problemasi yo‘qchilik emas, isrofgarchilik. Lyudi – da chego isrofgarchilik, da chego offigeli… Noliyveradi. Nega noliyveradi, bilasizmi, chunki biz o‘sha sobiq sovet davrida tayyoriga o‘rganib qolganmiz. Tanbal bo‘lib qolganmiz. Hozir, ishlasang-tishlaysan. Shuning uchun ham “Dunyoni nima qutqaradi”, degan savolni men qabul qila olmayman. Yaxshilik hamisha mavjud. “Faxrli inson”ni qilganimdan keyin bildim. Bir kunda 18 million so‘m yig‘dim. Yaxshilar yo‘q deysizmi? “So‘g‘diyona” bilan shu ishni boshlaganimizda shu xayriya uchun 100 dollar topolmas edik… Ana o‘sha tilni buzayotgan saytim o‘z auditoriyasidan odamning hayotini saqlash uchun shuncha pul yig‘ib berdi-ku! Menga forumda yozishadi, bir bola yaqinda yozdiki, ko‘cha bolasi edim, yomon yo‘llarda yurardim, shu saytga kirib fikrlarim o‘zgardi, deb. Bu narsa saytimning ma’naviyat ham ulashayotgani dalili emasmi?! Dunyoni menimcha shukronalik qutqarsa kerak. Hamma narsaga shukr qilish kerak, niyatini toza qilish kerak. Yana bitta narsa borki, hamma narsa yaxshi bo‘laversa, bu dunyo dunyo bo‘lmay qoladi. Shak bo‘lmasin, o‘zi kechirsin-u: unda jannatni Xudo rekonstruksiya qilishi kerak bo‘ladi!.. Dunyo sinovli dunyo. Ko‘chaga chiqsam hozir meni yoki sizni mashina urib, o‘lib ketishimiz ham mumkin. Hech narsani olib ketolmaymiz. Toza qalbgina ketadi. Niyat toza bo‘lsa, bu pullar, narsalar hammasi o‘zi kelaveradi. Pulni ortidan quvmasang, pul o‘zi seni ortingdan quvarkan. Masalan mana bu narsa sovg‘a, buyam sovg‘a, bunisiyam sovg‘a. (Qo‘lidagi plansheti, telefoni, futbolkasi, brasletini ko‘rsatadi).

Yakun va eng issiq nuqta

IDROK.UZ: – “Nuriddin Rahmanov” nomli muxlis “Yulduzlar bila suhbat qurganda ularning kayfiyatiga qarab suhbatlashasizmi yoki o‘z yo‘nalishingizdami?” deya savol yuborgan. Aytingchi, uslub va o‘ziga xoslik muhimmi Sardor aka? 
Sardor KOMILOV: –Toza qalb bo‘lsa bas, shu kerak. Men shu paytgacha hech bir artisni yoniga yalaqilanib bormaganman. Chaqiradi, boraman. Inson o‘zligini yo‘qotmasligi kerak. Qanday bor, shunday bo‘lishi kerak. Nima qilasan boshqaga o‘xshab?! Nilufar Usmonova bilan gaplashsangiz, g‘irt onasiga taqlid, gap so‘z, mimikalari onasiniki, o‘zi esa Hakimova bo‘lib yotibdi. Buni xo‘p mayli onasi-da desangiz, to‘ylarda Yulduzning pilusni qo‘yib, og‘iz qimirlatishga o‘tib olibdi. Uyat emasmi, axir.
O‘sha “Tayyor tur shou biznes”dan keyin “Davay-davay” deganlar ko‘p bo‘ldi. Lekin shou-biznesdagilarning ko‘pchiligi shundoq ham tushundi. Gap egasini topganlari pisib ham qoldi.
Maqtanish emas-ku, shu paytgacha yaxshigina marraga erishdim. “O‘zbeknavo”ning o‘zi diplom berdi. Shou biznes va uning atrofidagi auditoriyani shu sayt orqali jamlay oldim. Boshqa jurnalistlar yaqiniga ham kela olmagan inson dastlab menga “Sevganimga atalgan” noma orqali muxlislik qilib, keyin men uning yonida ham yurdim. Intervyular oldim, “Darakchi”ga ham suhbat bermagan o‘sha odam hatto saytimga qo‘ygan materialimga fikr bildira boshladi. Siz esa o‘zingni to‘g‘rila deysiz yana…
Men ilohiy narsalarga ishonaman. O‘zlik bu eng muhimi. “Jumanji”ga biror marta tayyorlanmaganmiz, lekin zo‘r chiqardi. Haligacha so‘rashadi. Lekin ortga qaytishni istamayman, yangi loyihalar qilish kerak. Jamoa bo‘lib ishlaydigan yaxshi jurnalisitlar kerak. Insonda halollik va rostgo‘ylik bo‘lishi kerak. Ishchilarimdan ham shuni talab qilaman. Yana bir narsa ham borki, men bilan ishlagan ba’zilar yulduzlar davrasida yurib saytga bir ikkita xizmati singach, “zvyozdani yoqvolishadi”, burni ko‘tariladi. Artislarni telefon raqamini yig‘ib olach, o‘zi alohida sayt ochadimi-yey?!.. Fotograflarimiz esa Gulnora Karimova, Yulduz Usmonovalarni “sayyodmedia xodimi” sifatida suratga olishadi-da, ular ham osmonga chiqvolishadi. Bilasiz, bu ayollarimiz uncha-buncha odamga o‘zlarini rasmga olishga ruhsat berishmaydi. Yozishingiz mumkin, Abdurahmon Sodiqov degan fotografimiz bilan ham “yulduzlik kasaliga chalingan” tashhisi bilan hayrlashdik. O‘rniga mana uchta fotograf oldik.
Ba’zan “Maddohxon”larni eslasam… Xizmatiga maledes, zo‘r ishlagan o‘z paytida, lekin orqamdan pichoq urganini kechirishim qiyin…
Lekin hayotda inson xasad, ko‘rolmaslik, birovga nisbatan nafrat kabi qirralarni yo‘qotishi kerak. Shuning uchun u darajada ich-ichimdan yomonligim yo‘q hech kimga. Men bilan ishlaganida yig‘ib olgan artistlarning telefon raqamlari, o‘sha paytda “sayyod”ning ortidan orttirgan obro‘si orqali hozir non topyapti, mayli, omadini bersin. Buvim o‘rgatishgan: «Senga yomonlik qilgan odamni ham kechir va undan kechirim ham so‘ra». Har kuni uxlashdan avval kun davomida qilgan ishlarimni o‘ylayman, ana shu kechirish va kechirim so‘rashni kanda qilmayman. Duolarni o‘qib, ko‘nglimni poklab keyin uxlayman. Sizga bir sirni aytaman: “Baxt” maktabi ochmoqchiman yaqinda. Meni bu uslubim hozirgacha ko‘pchilikka yordam bergan, rahmatlar ham eshitganman hatto. Ana shuni kengroq yoyib, ko‘proq odamga yaxshilik ulashishni psixologik to‘garak shaklida yo‘lga qo‘ymoqchiman. Bu hech qanaqa oqim yoki sekta emas lekin… (kuladi).

Foto: ©Sayyodmedia________________________________________________________________

P/S: Agar Sayyodni tashqarida bir yarim soatdan beri Kaniza kutib o‘tirmaganida va adminstrator Izzat bir necha marta xonaga kirib bu haqida eslatmaganida, Sardor Komilov bilan hali yana uzoq suhbatlashishimiz mumkin edi. Intervyu Kanizaning g‘iybati bilan ochilgan edi, qulog‘i qiziganmi balki, suhbatimiz tugamasidanoq yetib kelibdi, qarang!.. “Sayyodmedia”ning “jonli”ligiga gap yo‘q!..
Suhbatdan Sardor Komilov haqida olgan taassurotimni izohlamayman. Shunchaki, ustoz Ozod domla Sharafiddinovdan bir iqtibos keltirib, yakunlayman:
“Haqiqiy iste’dod egasi hech qachon jo‘ngina formulaga tushadigan yuzaki odam bo‘lmaydi. Uning hayoti hamisha oshkora va pinhona kurashga, kashfiyotlarga va yo‘qotishlarga, dramma va fojealarga to‘la bo‘ladi. Chinakam iste’dod egasi muntazam izlanishda bo‘lgani uchun, hamisha haqiqat qidirib yashagani uchun birda insonning ulug‘ligi oldida boshi ko‘kka yetguncha g‘ururlanib kekkaysa, birda insonning razolati va tubanligi qarshisida hafsalasi pir bo‘lib, umidsizlikka tushmog‘i mumkin. Haqiqiy adabiyotshunoslik esa san’atkor shaxsiyatidagi ana shu murakkablikni, siljishni, ko‘tarilish va tushishlarni, fazilatlar va qusirlarni topib ko‘sata bilmog‘i kerak”. 

Alisher ABDUMALIKXON, 
mustaqil jurnalist,
Mustaqil elektron OAV
“IDROK.UZ” uchun maxsus.
(Suratlar uchun «Sayyodmedia» xodimi Shahlo QODIROVAga alohida minnatdorchilik bildiramiz).