Навоийлик оғуфурушлар фаолиятига чек қўйилди

Ўтган йилнинг май ойида Навоий вилоят ҳуқуқни муҳофаза қилувчи органи томонидан Хатирчи туманидаги “Майдонсой” қишлоғида яшовчи Самад Қаюмов ва Нозима Холиқова (исм-фамилиялар ўзгартирилган)ларнинг хонадони текширилганда, томорқага экилган 157 туп гиёҳвандлик ўсимлиги топилган. Мазкур ҳолат юзасидан ўтказилган тергов-суриштирув жараёнида эса эр-хотиннинг гиёҳвандлик воситаларини сотиш билан боғлиқ бошқа жиноятлари ҳам ошкор бўлиб қолди. Бу ҳақида “Ҳуқуқ” газетаси хабар қилган

Маълум бўлишича, ўз хонадонида гиёҳвандлик ўсимлигини парваришлаб, “ҳосили”ни йиғиб олган эр-хотин ўтган йилнинг 20-март куни хонадонларига ташриф буюрган “мижоз”га оғирлиги 67 грамм бўлган гиёҳвандлик воситасини 100 минг сўмга пуллашади. Ўзларининг жиноий ҳаракатларини давом эттирган эр-хотин орадан 20 кун вақт ўтиб, хонадонига кириб келган “мижоз”ни қуруқ қўл билан қайтаришмайди. Унга 100 АҚШ доллари эвазига 105 граммга яқин “марихуана”ни сотиб юборишади.

Ўз хонадонида гиёҳвандлик воситасини етиштириб сотиш билан шуғулланган эр-хотиннинг ишини атрофлича ўрганиб чиққан Навоий шаҳар суди С.Қаюмовга 12 йил, Н.Холиқовага эса 11 йил муддатга озодликдан маҳрум этиш жазосини та­йинлади.